Кривогаштани Единица на локална самоуправа
Во рамките на Новогодишната агенда со многу смеа, детски џагор и празнична магија во паркот до општинската зграда се одржа Новогодишниот базар за оваа година.Овој настан ги собра сите дечиња од нашата општина, создавајќи незаборавна атмосфера полна со радост и ентузијазам. Додека пак, повозразните можеа да поминат квалитетно време со своите пријатели, колеги уживајќи во новогодишната атмосфера.
За почеток, приредбата од училиштето блескаше со енергија на распеаните и насмеани деца, кои преку неколку претстави, пеења и свирење на неколку музички инструменти ја претставија својата креативност и талент на едно навистина високо ниво.
Потоа на панаѓурот, се разбира во придружба со топол планински чај си купивме од бројните изложени рачни изработки, новогодишни украси, подароци слики и разни уникатни предмети, кои со љубов и посветеност ги изработија учениците и дечињата од градинка. 
Без зачудување, сите изработки се продадоа во еден миг.– Следеше дружење со омилените ликови од цртаните филмови преку разни едукативни игри.
За крај, ја имавме претставата ,,Дедо Мраз е на пат’’ од театар ,,Колозов’’ која што беше вистинско уживање за сите присутни, внесувајќи топлина и празничен дух на сцената.
Новогодишната радост им ја зголеми присуството на најпосакуваниот гостин – Дедо Мраз кој што подели новогодишни пакетчина.
За нас, настанот покажа дека соработката меѓу училиштата и заедницата е клуч за организирање вакви успешни настани кои оставаат траен впечаток кај децата и посебно чувство на припадност.Благодарение на учесниците и посетителите, оваа година новогодишниот базар беше уште поспецијален, топол и искрен, додека пак детската радост беше најголемата награда за сите присутни.
Празничната магија продолжува а со вакви настани ја поттикнуваме креативноста и солидарноста кај најмладите, подготвувајќи ги за иднината со вредности и моменти што траат цел живот.
